Freitag, September 12, 2014 - 23:46

Mir hei uschecket, zOuto abgä u warte itz am Flughafe vo San Francisco uf besseri Zyte. Nei, dr Abreisetag isch erfahrigsgmäss läääng u müehsam. Aber, erfahrigsgmäss geit o dä mau düre. 

Mir hei ä long trip hinger üs: 

- 11 Bundesstaate; New Jersey, Illinois, Missouri, Kansas, Oklahoma, Texas, New Mexico, Arizona, Utah, Nevada, California. 
- 4 Grossschtedt; New York, Chicago, Las Vegas, San Francisco.
- 5 Nationalpärk: Grand Canyon, Bryce Canyon, Death Valley, Yosemite, Alcatraz. 
- 15 mau Koffere us u ipackt. 
- Über 3'315 Meilen zrugleit (ca. 5'335 km). 
- Ds einte oder ds angere Bierli gno.
- 1 Outlet läär kouft. (hät ouso no eis meh iche möge ;-)
- Unzähligi Strasse u Chlischtedt. 
- Motels, Fastfoodkettene u natürlech paar mau i Denny's ;-)
- Öpis Dollar verspiut u paari gwunne.
- Blogget wi verruckt! Ganzi 28 Blogiträg.
- 1348 Fotos gschosse.
- 11 mau im Starbucks ganes Kafi nä.
- Möni u Evi hei 22 Selfies gmacht.
- Eis Rodeo bsuecht.
- Siebe Paar nöi Skechers Schueh wärde mit üs id Schwiz zrug chere :-).

Fazit: Guys, we had a good time! 

Freitag, September 12, 2014 - 23:23

Irgendwo het sech nö üse beliebt Reiseblogger Smokey ichegschliche. Wär fingts use? Viu Glück! Ds gwinne gits dasmau Nüt. Jawohl!

                     
Freitag, September 12, 2014 - 03:09

Am letschte Tag het eis Highlight ds angere gjagt. Agfange hets mitere unfründleche Bedienig im Denny's. Das gits doch gar nid ;-). När di ungloublechi Ussicht im Lincoln Park ufe Beach wome wäg Näbu nid gseh het. Di vergäblechi Suechi im Golden Gate Park nach Hippies het zimlech Zyt i Aspruch gno, hätte mer doch gärn ds Flower Power Feeling vo dere Stadt chli miterläbt... Der Höhepunkt vo Hüt isch gsi, das eis vo de berüehmte Fullhouse-Hüser am Alamo Square momentan im Umbou isch, so dases so versch... het usgseh fürs Fötele, dasmer üs d'Müeh gar nid gmacht hei azhaute. Grummel. 

Derfür heimer d'Golden Gate Bridge ire ganz schöne Stimmig chönne gniesse und hei o der Usblick vom Twin Peak uf d'Stadt bestuunet. 

Dr churz Abschtächer ids Castro-Viertel het üsi Luune chli ghobe. Bi au denä Peace and Love Fähnli u dä härzige glichgschlächtleche Pärli uf dr Schtrass, muess mä eifach lächle :-).

Miteme lachende und eme grännende Oug lömers la Abe wärde u mache üs ds letscht mau ufd Suechi nacheme Steakhouse. 

Peace and Love, öie Flower-Smokey

       
Donnerstag, September 11, 2014 - 03:53

Nachem scho fasch traditionelle Brunch im Denny's, simer chli am Fishermans Wharf hin u här gschuenet u hei d'Seelöie bsuecht wosech bim Pier 39 hei nieder glah u di kalifornischi Sunne gniesse.

Zum Glück heimer vorere Wuche online Tickets bsteut für Alcatraz, schüsch hätte mer de chli truurig dri gluegt. Überau hei eim Tafele d'Nachricht mitteilt "SOLD OUT TODAY".

Auso heimer der Alcatraz-Kutter gno und si üs di Gschichte vo de ehemalige Insasse vo däm Gfängnis ga alose, wo gwüss unger d'Huut gö...

Break the rules you go to prison, break the prison rules you go to Alcatraz.

Es isch sehr idrücklech gsi u irgendwie isch me sech bau froh, weme vo dere Insle wider wäg chunt. Aber für aui wo mau uf Frisco gö, isch e Bsuech uf Alcatraz ein Muss! 

No schnäu zur Lombardstreet ufe klätteret, paar Föteli gschosse u ab ufs Taxi für am Union Square no dr eint oder anger Lade vo Inne ga ds betrachte. Its am verdiente Firabebier heimr gad bemurmlet, dasmer druf warte bises Inachtet, für dasmer ufe Twin Peaks ufe chöi um San Francisco bi Nacht ga z'bestuune.
 
Smokey wo zum Glück zwüsch de Gitterstäb düre ma:-)

 

                
Mittwoch, September 10, 2014 - 01:28

Mit chli enttüschte Gsichter hei mr üs vom Yosemite verabschiedet. Mir hei ke Bär gseh und hätte doch fescht dermit grächnet. Das isch fasch wie nach Vegas fahre, i vouer Überzügig das mä dr gross Jackpot hout, när isch de glich nüt gsi ;-). 
Zum letschtä mau hei mr üses ganze Baggage im Outo verschtout und üs für nä längeri Fahrt ignuschet. Los geits zersch düre dicht Wald vom Yosemite. Päss z'dürab und z'düruf. Irgendwie ligt da e komische Näbel ir Luft. Bim gneuer häre luege, oder besser gseit schmöcke, heimer aber gmerkt dass das ke Näbu isch, sondern Rouchschwadene vomene Waldbrand. Über sächs Quadratkilometer vom Park heter verschlückt, wimer speter uf der Titelsite vore Zitig gläse hei. 

Wieder mau het säch dLandschaft völlig veränderet. Äs isch nüme so heiss, aber sehr trochen. Dr Bode isch usdörret und wit u breit ke grüen. Z'Gras het ä guldige Farbton agno und die paar Böim wos het, schine o eher knurrig u dürr. Nacheme churze Cola-Shop-Stop gsehts ringsum wieder völlig anders us. Mir fahre dür ändlos würkendi Olivenhaine u de scho gli ufe Freeway nach San Francisco. Holperdipolperholper... D'Schtrasse in California si ä rächti Herusforderig für jedi Blase ;-). 

Über dBay Bridge geits ine uf San Francisco. Im Hotel icheckt mache mr üs uf, u gö mau die erschte Meter in Frisco ga erkunde. 

 
Dienstag, September 9, 2014 - 03:44

 

Für das mir hüt nid all zu früeh us de Fädere hei müesse, heimer aui zimlech chlini Öigli gha. Nacheme aständige zMorge, simer richtig 
Yosemite Nationalpark gfahre. Mir hei üs aui sehr ufd Natur gfröit, nach der künstlechschte Stadt vor Wäut. Nach de erschte Wows womer bi de Seeli hei vo üs gä, heimr aui gäge Schlaf kämpft u si bir nächschte Tankstell ganes Kafi hole. Mir chöi üs die Müedi wo üs überschattet nume damit erkläre, dasmer vo geschter uf hüt e zimlech grosse Temperaturwächsu düregmacht hei. Vo 47 Grad uf 12 Grad ache (am Vormittag) isch nid grad ohne...

U uf das ufe heimer doch tatsächlech wider mau chli Räge gha! Aber nume bis zu däm Zytpunkt womer üs ändlech d'Müeh hei gmacht üser Koffere uf der Suechi nachere Rägejagge ds derwüehle, de isch d'Sunne gad wider uftoucht u het nis der räschtlech Tag begleitet.

Dr Yosemite isch ä wunderschöne und seeehr grosse Park. Bim dürefahre hei mr paar mau aghaute u dr Föteler zückt. Vilech si mr afe chli übersättigt vo au denä Idrück uf üsere Reis. Jedäfau hei mr üs ä Wanderig oder Tour gschpart, si schnurschtracks i üsi Lodge ga ichecke u höckle itz ufem Terrässli u tüe de Squirrels zueluege. Ä wunderschöne blaue Vogel chunt ab und zue ono cho posiere ;-). Hänsu u Roger si im Store ga ichoufe, da mr üs hüt mau äs Picknick ufem Terrässli anschteu vom nä Bitz Fleisch im Reschti gönne. Ufem Wäg hei si anang gwarnet vor denä zwöi Hirsche-Statue am Schtrasserand - bis sie säch bewegt hei! Üsi Manne si rächt erchlüpft :-). Vilech gseh mr ja glich no ä Bär oder süsch äs Vichli, mir mögte üs das gönne :-)! 

Smokey, wo dRueh nach dr Glitzerschtadt gniesst. 

          
Montag, September 8, 2014 - 03:35

Mir hei üs usem riese Hotel/Casino MGM usekämpft u Usschou ghalte nacheme Taxi. Dr alt Strip ar Fremont St. isch nämlech ä ganze Bitz entfernt vom nöiere Teil. Möni het ä chline Schock und ä Lachafau übercho, wo bire Chrüzig ä Homeless über dOutohube gumpet isch. Dr Taxifahrer het säch vo däm nid la beidrucke, aber mir hei aui rächt grossi Ouge gmacht. Er het gmeint, das chöm öpe die mau vor. Acho am alte Strip si mr agnähm überrascht worde. O dert blinkts u glitzerets überau, aber das mit Glüehbire! Das git ä ganz eigete Charme u erinneret würklech chli a früecher. Allgemein zTempo ringsum isch chli ruhiger. Ouso nid würklech ruhig, aber doch spürbar. Nachem Znacht ir Hennessey's Tavern hei mr eigentläch gmüetlech dr Strip wöue abspaziere, aber si scho im erschte Casino blibe hange. Evi u Möni hei am erschtä 25 Cent Outomat grad 100 Dollar gwunne u si is Spielfieber cho. Buchhalter Hänsu isch je lenger um so muetiger worde u het säch schlussändlech ono a Blackjack Tisch gwagt. Roger het sis Glück sowou am Tisch wie o a verschiedenschte Outomate versuecht. Leider isch o dasmau dr gross Jackpot usblibe. De isch haut nüt gsi mit nomau chli ga Outlet unsicher mache, aber mir dörfe emu im ne aständige Bett ga schlafe, da mer aui gnue vernünftig si blibe;-)

Nach dr relativ churze Nacht hei mr üs im Outo igrichtet, da hüt ä relativ längi Fahrt vor üs ligt. Bereits churz nach Vegas fat zNüt wieder a. D'Temperaturazeig im Outo chläteret langsam aber sicher obsi u dLandschaft wird immer meh zur Wüeschti. Mir fahre näbeme riesige Militär-Teschtgebiet entlang, nach langem Nüt toucht am Strasserand ä giftgrüene Shop mit Tankschteu uf. Z'Area 51 müesst irgendwo hie si! Im Shop gits jenschti Alien-Souvenirs z'choufe, mir haute üs aber a z'wohlbekannte Cola. Ob hie würklech irgendwo äs UFO mit Aliens vor NASA gheimghaute wird oder ob die Verschwörigstheoretiker eifach chli viu Sunne verwütscht hei, wärde mr äue nie erfahre.

Äs isch no heisser worde u mir hei üs mit üsem Van is Death Valley gwagt. Zersch isches über nä Pass u vor üs het säch äs grosses Tal uftah. Bim usschtige het sächs agfüehlt, aus würd mä vor am nä heisse Backofe schtah. Die Hitz isch so trochen, das mä nidemau meh schwitzt. Da chasch di auso ga la niedergare. Ungloublech, aber sogar a däm ungaschtleche Ort hets ä Campingplatz! Sie empfähle aber, nach dä zähne am Morge nüme ga z'wandere. Mitts im Tal hets 115 Fahrenheit azeigt, das si 47 Grad! Usem Tal use, wiederum über nä Pass, hets plötzlech nach Benzin gschmöckt u üse Van het kichet u knorzet. Da hei mr itz aber no grad chli Glück gha (nid wie zVegas ;-). Bim tanke isch chli Benzin usse abe glüfe, das hets äue grad möge verschmürzele. Aber dr Gedanke usgrächnet hie ä Panne z'ha, het üs scho nid grad so agmacht. 

Nachem Death Valley veränderet sech dLandschaft gli wieder. Es het immer no nid bsungers viu zum luege, aber dr Bode würkt nüm ganz so usdörrt und läblos. Üses Übernachtigsziel isch Bishop, churz vorem Yosemite Nationalpark. Roger het scho googlet und dert hätts ouso ono äs chlises Casino. Mir si itz zwar in California, aber d'Indianer dörfe uf ihrem Land Glücksspiel abiete. Vilech fordere mr zGlück de nomau use ;-). Vilech gö mr aber o eifach früeh ungere. Emu ei Teil vor Reisegsellschaft. 

Smokey, wo ganz knapp am Hitzetod entronne isch, puuuh ;-)

                 
Sonntag, September 7, 2014 - 03:26

Fortuna het üse geschtrig Schtreifzug dür Casinos nid begleitet. Die Outomate hei üsi Dollarnötli ichezoge, aber leider het's nie so richtig klingelet und blinkt. Söu heisse, mir hei ke Jackpot knackt u müesse itz haut hinech no einisch ufe Strip ;-). Dasmau gö mr aber richtig alte Strip. Roger het gmeint, dert chön mä nume gwinne! 

Die erschte Idrück vo derä Schtadt hei sech no gfeschtiget. In Vegas isch nüt schöns, bezoubernd oder erholsam. Aues isch z'lut, z'grell, und schreit um Ufmerksamkeit. I jedem Egge schteit ä Lutschprächer wo irgend ä hertä Beat uf dSchtrass schallet. Ab und zue ä Schtrassekünschtler, männlechi u wiblechi, meischt liecht bekleidet. We zTrummelfäll churz vorem Kollaps schteit, ab ines Casino - dert isch zLiecht agnähm dämpft u dOuge wärde sofort vo dä Outomate 
und Spieltische azoge. O hie isches relativ Lut. Aber a z'regumässige gebimmel u kling, kling vo dä Grät gwöhnt mä sech schnäu. Die hartgsottene Spieler haute das mehreri Tag düre. Im Casino inne schpiut Tageszyt ke Roue, egal was dusse passiert, dinne verliert mä jedes Zytgfüu. 

Für nis chli z'erhole, hei mr üs de hüt no a die riesigi Poolalage vom MGM gwagt. Dert herrscht Party non stop!  Us riesige Lutschprächer wird die ganzi Alag mit Technomusig ideckt. Im, am und rund ume Pool wärde Drinks u Bier gschlürft. U das ganze bi über 40 Grad im Schatte. Mä müess das mau gseh ha, het mä üs gseit. Idrücklech isch Vegas scho, aber trotz auem merkt mä, dass hie ganz viu heissi Luft i dWüschti blase wird. 

Smokey, wo säch itz nomau ufe Strip wagt u vilech glich no paar Dollar gwinnt ;-).

@Reto: mir hei di Kommentar ärnscht gno, si schnurschtracks ines Outback Steakhouse marschiert u hei vom Kellner äs Föteli mit aune la mache. Mir hoffe, es gfaut dr ;-).

                    
Samstag, September 6, 2014 - 02:19

Z'Nacht isch leider nid überragend gsi, aber me söt i der USA nid ds Gfüuh ha me bechöm e aständigi Pizza. Tja, aber isch its ds erscht mau womer chli dernäbe greckt hei.

Derfür heimer wider mau chönne usschlafe, da üses hütige Tagesziel nid so wit entfernt isch. 

Bim erschte Kafi womer dä Morge vorem Motel am schlürfe si gsi, heimer dr Bryan kenne glehrt. Ä Kalifornier, mitti Füfzgi, symphatisch und sehr gsprächig. Är het üs gad e Zigarre abote, womer dankend abglehnt hei. Dr Bryan het unfreiwillig in St. Gerorge übernachtet, da si 38jährig, rot Ford Capri abgläge isch. Während sim zwöiwüchige Roadtrip isch its das scho ds dritt mau:-) 
Vorauem isches gloub nid so eifach für dä Charä no Ersatzteili ds finge. Womer aber du si losgfahre um üs es feins zMorge ds gönne, isch si Ford wider agsprunge, bereit um dr Bryan wider zu sim Daheim in San Diego ds bringe. Wi wit chunter äch dasmau? Schüsch hätter emu de no vier angeri Outos, vo däm här...

Bi ghfüuhte 60 Grad simer no es chliises Stoudämmeli ga luege. Dr Hooverdam isch gigantisch u sehr idrücklech gsi, aber me het fasch nüt gseh, wüu eim dr Schweiss nume so abeglüffe isch. Mit chli Fantasie gseht me sogar dr James Bond mit eim am schlegle.Gschwing tourimässig paar Föteli gschosse, hie es wow u dert es wow ghüchlet und ab wider is Outo. Es GROSSES Merci a Erfinder vor Klimaalag!

So, da wäre mer its. Las Vegas! Mir si afe im MGM ga ichecke u hei fasch chli Angscht gha, ob mer its am Flughafe glandet si u nid astöh für i nächscht Flüger. Aber nach 40 Minute heimer du glücklecherwis es Hotelzimmer becho u nid es Flugticket.

E churze Rundgang dürd Hotelalag speter hocke mer im Zimmer u sammle üse ganz Muet u au üser 1-Dollar Nötli zäme u wage üs i Bling Bling-Dschungel use.

Ob mer its Millionäre si, oder ob mer üs es kuschligs Eggeli unger der Brügg hei müesse sueche, erfahreter Morn uf däm Blog.

Dr Smokey wo überau nume no Dollarzeiche gseht!

(Fotos von Vegas folgen)

 

 

         
Freitag, September 5, 2014 - 01:56

Zersch mau äs grosses Merci a Abi's! Dank ihrem Tip hei mr hüt dr Bryce Canyon bsuecht u si absolut hin u wäg. Aber vo Afang a: ZGeschtrige zNacht im RockingV in Kanab, Utah isch z'bishär beschtä Ässe gsi. Mir wei itz hie nid irgendwie Wärbig mache, aber nach au däm Fast Food hets geschter wieder mau so richtig fein säuber kochets gä :-). Früsches Gmües, säuber gmachti Teigware u feine Härdöpfuschtock u natürlech ä richtig guete Bitz Fleisch. Yammm... 

Hüt Morge de, usgschlafe und rächt munter, hei mr üs de ufä Wäg gmacht richtig Bryce Canyon. Bi dä erschtä rote Felse hei mr ganz entusiastisch aghalte u gfötelet. När isch eigentläch nur Wald cho u mir hei üs scho gfragt, was äch de da so speziell söu si? Nach paar Meter zFuess het säch vor üs ä Landschaft us rote, dunkle u häue zerklüftete Felse uftah. Mir si mit offenem Mu blibe schtah u hei gar nüm gwüsst wo luege. Dr Fotoapparat hei mr gar nüm wäggleit. Au paar Schritt het säch Perspektive veränderet u mir si nid usem Schtune use cho. Hänsu hät so gärn Tierli gseh, aber ussert eim chline Chipmunk wo grad dervo ghüpft isch, het säch nüt zeigt. Au die Bäre, Bärglöie und Klapperschlange si äue das Blitzliechtgwitter vo dä Touris afe chli leid. 

Wieder mau dr Chopf vou mit Biuder, hei mr üs äs feins Subway-Sandwich gönnt u stüre dr nächscht Übernachtigspunkt a. Evi u Möni hei scho im Outo chli vor- oder nachegschlafe. Je nachdäm wie mäs aluegt ;-). 

Acho in St. George, heimr e Old Navy Lade gsichtet u si gad iche gstoche. Ds wibleche Shopping-Gen isch sehr schnäu aktiviert gsi
u d'Manne hei nach zwöi Minute ds Inventar vom Lade scho usswändig kennt, hei aber meh oder weniger geduldig gwartet. Ds Wohnviertel vo dere Stadt isch verglichbar mit dr Wisteria Lane vo Desperate Housewifes. Wunderschöni Hüser u der Rase gseht us aus würder täglech vomene persönleche Gärtner pflegt. So, mau ufd Suechi fürne Übernachtigsstell u öpis feins ds Habere.

Smokey, wo säch überleit dr Nachname Bryce aznäh 

                   

Seiten