Donnerstag, September 4, 2014 - 03:03

Mir wei üs mit däm Blogitrag speziell bi üsne Fans bedanke wo üs in Gedanke begleite. Öier Kommentär fröie üs immer sehr und motiviere üs täglech uf WiFi-Suechi ds ga u de Motels chli Internet ab ds zapfe. :-)

Öie Smokey!

Donnerstag, September 4, 2014 - 02:38

Z'Ufschtah isch hüt nid aune glich ring gange. Aber schlussändlech si mr aui vieri, meh oder weniger brummlig, im Outo ghocket. Z'hütige Highlight: dr Grand Canyon. Scho bevor mr si i Nationalpark cho, het säch dLandschaft wieder veränderet. Wieder meh grüen u bewaldet. Im Park inne touche Schilder uf wo vor Bäre u Pumas warne. Mä söu doch die, wenn müglech, nid überfahre. Leider hei mr aber keni Wildtierli gseh. Plötzlech tuet säch näb dr Strass ä Grabe uf... dr Grand Canyon isch würklech seeehr gross! Wahnsinn die Landschaft! Natürlech het säch dä Hingergrund abote, für paar gueti Föteli z'schiesse. Fassbar isch das nid würklech, aber ä grandiosi Ussicht gsi. 

Evi het sech de o mau hingers Schtür trout u grad ä wunderschöne Schtreckeabschnitt verwütscht. D'Schtrass wo säch wieder schnurgrad bis a Horizont zieht. Links u rächts touche Felsformatione uf und dr Bode u d'Felse trage aui Variante vo Rottöne. Inzwüsche chunt üs zCountry Gedudel scho fasch us dä Ohre u mir hei mau chli Radiosänder gwächslet. Bi dä verschiedene Musiggschmäcker gar nid so eifach :-)

Nachdäm mr üs entschidä hei am Canyon säuber nid izcherä, da i denä Pärk dPrise bitz pfäfferet si, knurret itz aune dr Mage. Die witi u lähri isch würklech schön zum luege, aber mir hätte scho lang irgendwo hie ä McDonalds oder so häre gschteut. Ouso das isch ä Marktlücke! Aber mir heis ohni zMittag bis zu üsem nächschte Etappeziel erreicht:-)

Für zÜbernachte hei mr sowou ä Staatsgränze (mir si itz in Kanab, Utah) wie o wieder ä Zytzone überfahre. Itz gönne mr üs äs Apéröli u äue de o scho gli mau ä Hüpfer is King-Size Bett. 

Smokey, wo itz afe chli muess Idrück verdoue.

               
Mittwoch, September 3, 2014 - 02:29

Nachtrag vo Geschter:

Möni u Evy hei e chliiiine Moscato becho. Mit Vorsicht heisi nume es Glas bsteut. Da mir ja im XXL-Land si, isch o ds Glas dämentsprächend gross gsi. Aber wi säch das bim gmüetleche z'Nachtässe so ghört, het no nes Fläscheli Malbec häre müesse. Fazit: Möni u Evy si vor luter Guggele-Attackene fasch nüm zum Schnuufe cho. Sehr wahrschinlech hei d'Hitz u d'Müedi ihre Teil ono derzue bitreit. Zum Glück isch üses Motel nume e Hustür witer gsi wo nä när Roger es feins Käfeli gmacht het. Ds Viertehöch heimer nis ufem King size Bed gmüetlech gmacht u hei "All about Mary" im Tv gluegt. Hänsu isch fasch i Fernseh iche verschwunde wo Cameron Diaz über Bildschirm gflimmeret isch. Aber ehrlech, heiter d'Cameron mit Originalstimm scho mau ghöre lache?? Muhahaha! Zum Glück isch si bi üs synchronisiert:-) Aus i auem e ganz gmüetleche Abe gsi. 

Päpu, merci füre Tipp vom Outomuseum, aber da mirs gad ufe Labor Day (dr amerikanisch Tag der Arbeit) breicht hei, isches leider zue gsi.

Gstercht miteme zMorge im Denny's, simer in Santa Rosa ga ds Blue Hole luege. Es 26 Meter töiffs Wasserloch ir Wüesti, wo vili Toucher azieht. Uff, dir gloubet nid wi verlockend das Wasser het usgseh, weme näbe dran steit u eim der Schweiss der Gring ablouft. Aber Neeeei, niemer ussert Evy wär ds ha gsi, hurti gane Schwumm ds nä. Och, Spielverderber:-)

Üsi momentani Ussicht usem Outo use: Nüt, no meh Nüt, Sand, Gras, blaue Himmu, Strass, Nüt, no Nüter, oh Momänt! Nei isch Nüt gsi. 

In Albigurke wimers eifachheitshalber nenne (Albuquerque) simer es Indianer Monument ga erkunde. E Fels mit vilem Vulkangestein wo d'Indianer gnutzt hei um über 20'000 Zeichnige dri ds ritze. Roger fingt ds zwar e Frächheit das di Indianer da aus so hei Verunstaltet hei mit ihrne Chinderzeichnige. Möni het gwüss e chli Müeh gha womer ds Schild mit der Warnig vor Klapperschlange gsichtet hei. Das het Hänsu gad zure Rattlesnake-Suechi inspiriert wo leider (oder zum Glück?) erfolglos usgfaue isch. Roger's Näsi het üs für zMittag zumene Subway gfüehrt, womer üs gnüsslech es säuberbastlets Sandwich gönnt hei. 
D'Landschaft veränderet sech wildwestlecher mit rote Steinformatione, me erwartet scho fasch e Indianerstamm uf de Felse obe, wartend u ihrer Pfileböge gspannt, bereit zum Agriff. DSchtrass füehrt schnurgrad nach Weschte u kes Ändi isch in Sicht. Äs isch würklech erschtunlech, we mä säch die Sidler dennzumau vorschteut. Fasch 40 Grad im Schatte, wobi mä dr Schatte vergäblech suecht und wit u breit u no witer nur Schteine, Sang u paar einsami Büschli. 

Hänsu het üs hüt vei wit umegschoffiert. Ändlech im Hotel in Holbrook acho, hei aber dManne nüt bessers gwüsst aus dr Fitnessruum ga zTeschtä. Evi u Möni hei säch ä churze Schwumm im Pool gönnt. Sie finge sie heige mit däm dr besser gmacht ;-) Nachem (hoffentläch) feine zNacht gönne mir üs de no ä Schlummertrunk ir lokale Sports-Bar. 

Öie Smokey, wos bis its no nid gschafft het schneuer aus si Schatte ds si.

                 
Dienstag, September 2, 2014 - 00:10

Nach dr relativ churze Nacht, mir si ja geschter am Rodeo im Usgang gsi ;-), geits witer uf dr Interstate richtig Weschte. Mir müesse chli Zyt ufhole und da dRoute 66 ca. 10 Meter näbe dr Interstate parallel bis a Horizont füehrt... Erschte Halt isch dr schief Turm vo Groom. Äxtra für Tourischte ufgschteut, hei mr hurti müesse fötele. di dumme Touris faue o uf jede Seich iche:-) Witer geits nach Texola, eini vo dä erschtä Geischterschtädt. ganzi 47 Iwohner. Das het aber so usgschtorbe usgseh, das mr gar nid hei aghaute. In Amarillo het Evy wieder mau ä Abschtächer inä Antiquitätelade gmacht. Hänsu fingt die nid so toll, het aber gnädigerwis dusse gwartet. Im lokale Smokey Joe's-Burger Beizli hei mr de fasch dNärve verlore. Die Bedienig dert het jedä Wäg mehrmaus gmacht und sooo viu Zyt brucht für ds sinnlose Hin u Här. Hänsu het immer verschteinerete Gsichtsusdruck übercho. So nä Burger geit emu nid so lang! Ändlech wieder witer, nume nid so wit, da grad hinger Amarillo die berühmte Cadillacs im Bode schteckä. O das ä churze Stop wärt gsi. Itz si mr in Tucumcari acho. Chli ender aus o scho, gönne sech Evy u Möni a Daiquiris und dManne äs chüehls Bier. Beiz fürds zNacht heimer oscho gsichtet. natürlech Mexican Food, mir si ja schliesslech in New Mexico!

Arriba! Arriba! Öie Smokey

          
Montag, September 1, 2014 - 06:23

D'Nacht im Grusel-Hotel heimer guet überstange. Gar nid so dramatisch gsi wimer gmeint hei. Nachdäm mir ds National Memorial vo Oklahoma bsuecht hei, wo ufgrund vom Bombeaschlag am 17. April 1995 isch errichtet worde, heimer üs im Denny's es köschtlechs z'Morge la serviere. Ds Denkmal isch gwüss gad chli unger d'Huut...168 Toti und über 500 Verletzti hets denn gä.

Guet gstercht u munter simer punkt 11.00 Uhr zur Outleteröffnig i de Startlöcher gstange. Achtung, fertig, LOS! Outlet-Shopping-Run bi 38 Grad! Nach füf Stung heimer aui ds Ziel bi üsem Chrysler erreicht. I wed hie no churz erwähne das Evy isch erschti worde u d'Herre gwüss mit 10min. Verspätig i ds Ziel gschnagget si:-) Aui mit grinsende, erschöpfte Gsichtli u rote Bäckli, heimer üser gfüuhte 700 Täschene i Van iche gstopft u si richtig Elk City cruiset. Üser Kreditkartene si nume no am chiiche u hächle, därum wärde mer ne mau paar Täg e Verschnuufpouse gönne.

In Elk City acho, isch e Chindertroum vo Möni wahr worde! Es Rodeo isch in Town ds Gast u mir hei üs Billet ghout no bevor mer es Hotelzimmer hei gha:-) Die ganzi Veraschtaltig chunt derhär wie näs riese Volksfescht. Grossi Trucks mit lääänge Ahänger fahre uf, drine dRoss u dBulle und natürlech Cowboys :-) Wär keni Schtifu, z'schönschte Hemli und ä Huet ane het, wird sofort aus Frömde abgschtämplet. mir hei paar schregi Blicke gerntet i üsne T-Shirt und Turnschueh. Ufem ganze Gländ gits ke Bier z'choufe, warum hei mr nid usegfunge. Nachem Gebät und dr Nationalhymne, gsunge vore 15jährige Highschoolerin (oder wie mä das o immer seit),  isches de losgange. Ä mega Show! Näbem klassische Rodeo ufem bockende Ross und Chälbli fah mitem Lasso isch dr Höhepunkt natürlech zBullriding gsi. Hei mr eifach agno, wägem frenetische Applaus vom Publikum ;-) Zwüschine immer wieder Showilage z.B. mit paar ächte Wasserbüffle. Das ganze het öpis über 2 Schtung duuret, het üs beidruckt und isch sehr churzwilig gsi. Paar mau hei üsi Härz schneuer gschlage, öpe we dr Cowboy am bode ligt und dr Bulle nä no hurti wot ufschpiesse. Aber zum Glück isch nüt schlimms passiert. Ar live Country Band hei mr de nüm so lang möge zuelose u gönne üs stattdessä vorem Hotel no äs Bierli. 

DSchtoubschüssle Oklahoma het meh z'biete aus mä dänkt u wird üs aune im Gedächtnis blibe. 

Howdy, Cowboys! 

               
Sonntag, August 31, 2014 - 04:54

Am Morge hei mr üs ufgmacht und pokeret, dass mr gli mau am nä Denny's verbi chöme. Evi het üs i so eim äs super Zmorge verschproche. jedoch si di Denny's hie rächt dünn gsäiht.Mir si de grad bis Carthage düregfahre u hei dert im lokale Beizli zmörgelet. So richtig typisch amerikanisch mit Spiegel- oder Rüehrei, Schpäck, Schinke, Röschti und no chli öpis Pancakes. Super Sach! Itz hei mr grad gässe bis am Abe ;-) Carthage het üs o süsch gfaue. Äs härzigs chlises Schtedtli mit paar Antiquitäteläde. Evi wär am liebschte ga umeschnöigge u Hänsu u Roger hei säch gfragt, warum da niene ä Mulde parat schteit für au dä Chabis wo aus Antiquität verchouft wird. 

Witer isches gange über dStaatsgränze nach Kansas. DManne hei müglechscht schnäu düre wöue, wüu in Kansas gits teilwis Alkoholverbot. Sie hei irgendwie zÄndi vor Prohibition verpasst. Aber zGalena hei üs plötzlech dHouptdarschteuer vom Disney Fium Cars agrinset. Da hei mr müesse ahaute! Melba Rigg, Bsitzerin vo derä "Sehenswürdigkeit" het säuber ä Schprächrolle im Film. Sie isch "the Mouth", was mä sofort merkt, we sie fat afa quassle ;-) Grad näbe dä Cars schteit äs auts Bordell. Dert het dPuffmuetter paar Goldsuecher la verschwinde u zGold phaute, schtatt sie z'bediene. Ja, so isch das gange. 

Dür Kansas si mer de relativ zügig witer u scho gli im Staat Oklahoma acho. Langsam veränderet sech dLandschaft. Es wird trochener, heisser u no flacher. Bim White Oak Rancher ir nechi vo Vinita hei mr aghaute zum tanke. Bishär si üs Schilder ufgfaue, dass keni Waffe dörfe mit ine gno wärde. Hie isch usdrücklech erloubt, Waffe z'trage. Sie muess eifach im nä Holschter oder so verschtouet si. Tja, wilder Westen lässt grüssen! Dr Tankschteuebsitzer het de no gfragt vo wo mir si. Das miteme knurrige änglisch und z'rrrrr töif ir Kehlä :-) Herrläch wie säch dr Akzänt passend zur Landschaft veränderet. 

DÜbernachtig, grad bi Oklahoma City, hei mr vom ässe abhängig gmacht. Hänsu het no gar ke Fleisch gha hie - ouso, är fingt das emu. Därum zersch äs guets Steak House gsuecht und de ir nechi äs Motel.  Fazit isch: zÄsse isch absolut fantastisch gsi! Hänsu het sis Angus Steak, genau ufe Punkt, übercho. Dr Nachteil, zMotel isch chli gruselig. Nid grad so wi zCarson City (meine emu Roger u Evy), aber doch rächt gruslig ;-) Mau luege, ob mr chöi schlafe oder ob mr eifach ufe Morge warte. 

Smokey

               
Samstag, August 30, 2014 - 02:21

Üsi erschti Nacht ungerwägs hei mr im nä Super8 verbracht. Mir si froh gsi, wo mr is Hotel hei chöne flüchte, da s'plötzlech het afa Gwittere. In Amerika isch aues grösser. De si natürlech o Gwitter entstprächend beidruckend! 

Nachem usgiebige zMorge mit Joghurt und zum erschtä mau Ärdnussbutter für Hänsu ;-) si mr ume ab uf dStrass. In Illinois hei mr no ä chline Umwäg gmacht. Mir hei üs nid verfahre, das isch voui Absicht gsi, säge emu dManne. Het sich aber glohnt! Mir si a paar schöne Farms verbi cho, kilometer- bzw. meilewiti Maisfelder und irgendwo im nirgendwo wieder ä Chrüzig. Möni rächnet jederzyt miteme Tornado, genau uf so Strasse chöme die nämlech aube! Aber wägem strahlend blaue Himmel u öpe 34 Grad sie die angere nid so beunruhigt. Mängisch gö mit Möni eifach ihri Schäferhung-Gen düre. DHerdä muess zäme blibe und aui müesse Sorg ha, jawohl! 

Hänsu het säch hüt o hingers Schtür trout. Dr amerikanisch Fahrstil liegt o ihm im Bluet. Söu heisse mir chöme zügig vorwärts. Wie's o dAmis mache, hei mr i üsem Super-Van abeküehlt u loufe de bi dä churze Stops fasch us. Aber das macht mä hie so, schins. 

In St.Louis hei mr so richtig Tourimässig aghalte, si ir gröschte Hitz hurti zTor zum Weschtä ga Fötele u sofort wieder is chüehle Outo gschprunge. Für die wos nid wüsse: hie fat dr Weschtä a ;-) 

Wo mr äs Hüngerli hei übercho, het üs Roger zum Taco Bell glotset. D'Lucille wo dert schaffet, het grad äs Gschpräch mit üs agfange und mega fröid gha a paar Schwitzer wo ir USA umegondle. 

Übernachte tüe mr wieder mau im nä Super8 in Lebanon, ds BBQ isch ganz ir Nechi. D'Mam ar Reception isch rächt gschtresst gsi, da vor üs eine chli kompliziert het ta. So Internetbuechige si nid immer eifach. Derfür hets für aui vieri äs Upgrade gä u mir chöi us im nä Suiteli entspanne. 

Äs Highlight hüt isch no die erschti Wöscherei ungerwägs. Mir hei äxtra gluegt ob mä i däm Bundesstaat dusse darf Bierli trinke. Roger meint, we nüt schteit, de dörfe mr. So vertribe mr üs Zyt, während üsi Wösch wöschet ;-)

                
Freitag, August 29, 2014 - 03:49

Mir lehnä jeglächi Verantwortig für Rächtschribefähler, falschi Agabe oder süschtigi Fähler innerhaub vom Blog ab. Da die Texte zum Teil unger widrige Umschtänd z'schtang chöme (im Pub, hurti bim Z'mörgele, oder eifach we mr irgendwo Wifi verwütsche). Positive Kommentare si sehr willkomme! Jeglächi  Beschwärde oder süschtigi negativi Üsserige dörft dr für öich phaute. ;-)

Thanks 

Freitag, August 29, 2014 - 03:27

Mit Härzchlopfe hei mir üses Outo in Empfang gno. Äs isch nid so gross, het Platz für siebe Persone, inkl. Fernseh, ca. 20 Getränkehalter, Schiebetüre und sonstigem wo mr no gar nid hei gmerkt. We mr chli zämerücke, söte mr einigermasse z'gang cho ungerwägs ;-) Ironie off... nei, tatsächlech hei mr ä Chrysler Minivan, schwarz, mega cool! Hänsu u Roger hei übers ganze Gsicht gschtrahlet, wo mr si icheghöcklet. 
Möni u Evi hei ä Blick i Inneruum gworfe u gfunge, doch da cha mä pfüsele ;-) 

Roger het üs sicher us Chicago kutschiert. Scho nach paar Meter het är dr Fahrstil vo dä Amis kopiert. Mir wei ja nid uffaue hie. Itz hei mr scho paar Meile zruggleit u si ungerwägs uf dr Route 66! Möni schtört säch ä chli abem Chaos im Outo, aber hie cha mä itz würklech nid viu ufruume. Höchstens chli Täsche u Schueh umeschiebe. Das isch für Ordnigsliebhaber Möni chli ä Gwöhnigssach. Hänsu het Gschmack gfunge am hiesige Trockefleisch. O Not-, Zwüsche-, oder Resärvewürschtli gnennt. 

Im Radio louft Country, dusse schint Sunne, dStrass zieht sech vor üs wie mitem Lineal zoge. Rächts u links touche härzigi Schtetdli uf. Die Chlischtedt gseh us wie überdimensionali Campingplätz. Jedes Hüsli het ä Veranda, ä grosse Rase (säubverschtändlech miteme Rasemäiher zum drufhöckle;-) und vor dran schtöh 3 bis 6 Outo. Je nach Azahl Bewohner. Aues würkt fridlech u iladend. Innert paar Schtung si mr ire ganz angere Wäut acho u müesse üs itz zersch a die Kulturveränderig gwöhne. 

Ungerwägs nach Springfield, Illinois si mr zerscht mau zAmerika chli nass worde. Are aute Tankschteu hets hurti ä chline Rägegutsch gä. Das het däm Ort no ä zuesätzlech troschtlosi Note gä. 

Smokey, wo afe chli dr Euboge usem outo het und zum Country-Song im Radio mitem Chopf gwagglet.

       
Donnerstag, August 28, 2014 - 15:18

Chicago... seufz. Het üses Härz im Schturm eroberet! Aues würkt viu entspanneter und luftiger. DStrasse si breiter, uf dä Trottoirs weniger Lüt ungerwägs und zwüsche de Hochhüser gseht mä sogar dr Himmel. Grad scho die erschtä Meter zum zMörgele hei üs vo derä Stadt überzügt! Mir hei de so nä hop on - hop off Bus gschnappet u i nützlecher Frist scho zimli viu vo derä Stadt gseh. Da mä mit denä Cabriomässig ungerwägs isch, muess mä eifach ungerem Loop (Hochbahn) dr Chopf izieh. Mir hei näb dr wunderschöne Architektur, (auti und nöi) am agnähme lüftli o dr Navy Pier und sogar dr eint oder anger Dräihort (Superman und Batman ;-) chöne beschtune und gniesse. Sogar Hänsu het hüt mau dr Föteler id Hang gno, het ouso o ihm gfaue. Chicago het Charme und im Nu si mr aui vieri verliebt gsi. 

Da ds Junior Baseball-Team vo Chicago dMeischterschaft gwunne het, hei sie grad aues abgschpert, öpe hundert Polizischte ufbote, ä Parade organisiert und mind. drei Helikopter wo für's Fernseh aues ufnäh. Tja, so si sie die Amis. Patriotisch wime se kennt! Derfür hei mr paar mau Nachrichten gluegt, üs aber nid gfunge im Fernseh. 

Aus krönende Abschluss höckle mr itz im Buddy Guy's Legend und lose live Music, natürlech blues. Bim Röikle hei Evi u Möni dr Sänger Corey Dennison no zum nä Fötelei überredt, was ihn zimli gfröit het. Är isch übrigens nähscht Jahr in Luzern - mir chöi ä Bsuech nume empfähle!

zum Abschluss bevor mir de üse Mini-Van i Empfang näme,gömer no der berüehmt Brunne us der Serie "schrecklich nette Familie" mitem Al Bundy ga güggsle.

see you, öie begeischteret Smokey!

                       

Seiten