Mittwoch, August 27, 2014 - 14:14

Mir heis tatsächlech no gschafft nach Chicago ds cho, u das am gliche Tag:-)

Ds Hotel isch sehr schön! D'Herre si am Morge scho is Fitness für ds guete Gwüsse u Evy isch wider mau uf Koffeinjagt. Di Stadt isch e richtigi Wohltat nachem niemals schlafende Big Apple. Ruhig, aui flaniere gmüetlech dür d'Strasse u niemer secklet ghetzt bi rot über d'Ample. (Nid mau Hänsu)

Da mir geschter zimlech Zyt verlore hei um Chicago chli ufe Grund ds ga, heimer üs entschide, e Hop on Hop off Bus ga ds sueche. Ob mer eine gfunge hei und was mer aus erläbt hei, erfahreter im nächschte Bitrag.

Öie entspannt Smokey

Dienstag, August 26, 2014 - 20:20

Nachem zMörgele im La Guardia si mr parat gschtange füre Abflug. Aues tiptop klappet, hei üs im Flüger scho ignüschelet für näs Nücki. Dr Captain isch äue us Texas mit ame wunderschön breite Akzent. Aber wo mr hei losgugelet isch dFlight Attentant grad cho z'gumpe:" not laughing about the Captain!" het sie gmeint u miteme Ougezwinkere dGepäckablag zue ta. 
De isch sie de cho, die aues veränderndi und absolut unwillkommeni Asag. Ke Starterloubnis wäge schlächtem Wätter in Chicago. Ouso wieder aui usem Flüger, kes Nücki chöne näh u dWarterei isch losgange. Bitzeli schpeter isch dr Flug sogar Canceled - oh je! Wieder aschtah zum umbueche (aschtah tuet Roger mega gärn). U itz, mir warte immer no und hoffe das mr no hüt nach Chicago chöme. Ouso, warte tüe aui angere - Termi-Hänsu wartet natürlech nid, är macht ihr Abflughalle Ligeschtütz und duet Zyt sinnbringend nutze. 

Bis bald, u de hoffentläch us Chicago!
Smokey, wo nid so gärn wartet u viu lieber äs Nücki würd näh. 

   
Dienstag, August 26, 2014 - 20:17

Äs isch ä churzi, intensivi Begägnig gsi. Mir hei glachet, gschtunet, zMu offe vergässe, viu ufe gluegt u sogar paar Tränli vergosse. Äs isch, v.a. Hänsu u Möni, vorcho wie nä Fium. Das mr ä Teil zFuess gmacht hei, möcht hie nomau erwähnt si. Da hei mr itz no chli öpis dervo ;-)

Äs letschts mau i Starbucks - gits äch das angerne Orte o? U de mitem Räuber-Taxi ab a Flughafen La Guardia. Itz geits witer nach Chicago. Mir si gschpannt. D'Ample dert hei sicher aui scho uf grüen gschteut, wüu scho gli isch Termi-Hänsu in Town :-) 

Bis denn, Smokey

 
Dienstag, August 26, 2014 - 03:15

No mit läärem Mage und eme Starbucksbächer i de Händ, simer richtig Empire State Building gstoche u hei d'Morgestimmig vom 86. Stock obe ache beobachtet. När mau es feins Spiegelei mit chli Bacon zwüsch de Zäng, de louft sechs när sehr ring düre Central Park. Vorhär no e churze Zwüschestop im Grand Central Station. Mir hei aber üses gheimschte Gheimfach nüm gfunge, es isch fasch chli ds gheim:-)

Evy het unbedingt hurti i Vorruum vom National Museum müesse, um mau e sones Dinosaurier Skelett ds besichtige. Soooo cool! 

Sehr e dänkwürdige Momänt isch gsi, womer e Truurumzug vome Polizist hei chönne beobachte. Schottischi Musig, Liichewage und sis Revier als Begleitig. Hüehnerhuut, sägi da nume.

Da mer ja no fasch nüt glüffe si, simer no grosskotzet dürd Fifth Avenue flaniert.

@ Phipu u Däni: Üsi Grosstante isch hert im Nä, di läbt immer no!

Bim Rockefellercenter hets du für üs vertröchnete Pflänzli ändlech chli Dünger gä. När heimer no H&M unsicher gmacht, bevor mir ufnes Power Nap is Zimmer si. Its höckle mer bim wouverdiente z'Nacht, nachdäm mir üs dür x-Millione Mönsche bim Time Square hei dürekämpft. 

E Guete! Öie Smokey

               
Montag, August 25, 2014 - 03:57

Nachem erschte Tag ds New York...

Möni het e totali Reizüberfluetig, Roger het chli chlini Öigli, Termi-Hänsu wi immer völlig cool u Evy um zwöi paar Skechers Schueh riicher:-)

Wimes so macht, geit me hie ines französischs Restaurant ga zMörgele, gönt sech im Batterypark e Hot Dog with Sauerkraut (ussert Hänsu, dä het umsverrecke e Chickenkebab wöue) und zum zNacht e Pizza in Little Italy.

Hänsu isch scho zum New Yorker mutiert, laht sech vo nüt la beidrucke u geit NUME bi Rot über d'Strass.
Was no erstuunlech isch...es het eifach ds weni Starbucks, ds Kafi isch scho ustrunke u me mues no zwöi Meter loufe bis zum Nächschte. 

Da ja das hie no so ds erloufe isch, heimr mau dr Broadway i Agriff gno u si richtig Downtown tschirgget. Ds Glettise, Union Square, Freedom Tower, Wall Street u när bim Pier 16 ab uf ds Schiffli zur Freiheitsstatue und Skyline ga bestuune. U wüu das Ganz soooooo schön isch gsi, simer doch glatt wider di ganze Blocks zrug gsecklet!!! Isch emu Möni u Evy so vorcho, mit ihrne churze Scheichli. Ufem Time Square acho, hei üs doch tatsächlech no d'Minions i Empfang gno!:-) Da het natürlech es Foto müesse gmacht wärde! 

Möni u Evy si nöierdings Twins, het emu dä vor Lobby gmeint. Tickets für ds Empire State Building für Morn si scho kouft. 
So, ab id Fädere, bi Termi-Hänsu trügt der Schein, er isch nid unbeidruckt sondern ziiimlech fule u mues das Dörfliläbe hie o zersch mau verdoue.
Der Big Apple schläft nie, aber mir um so meh. Good Night and see you tomorow.

Öie Smokey

          
Sonntag, August 24, 2014 - 17:44

Üses Hotel isch mitts im Times Square. So der Hammer!!!

Aber its zersch no zur Reis...dr Flug mit der Swiss isch problemlos verlüffe. Geng ds Ässe becho, gueti Fiumli gluegt u de het me di 8 Std. o ume bracht. Aber när...Me brucht eifach viu, viu, viiiiuu Geduld für id Staate idsreise. Nach 2.5 Std. astah heisi üs aber doch de no iche gla:-) 

nachdäm mir miteme nöie Yellocab mit Dachfenster id City iche gchuttet si, simer afe mau ds ganze Baggage im Hotel ga ablade. Möni u Hänsu hei du tatsächlech no es upgrade fürne Suite becho :-) Ab i ds nächscht Irish Pub afe ganes wouh verdients Bierli süüffle:-) läbensrettend!

Ä feine Burger schpeter hei mr üs im herrläche King Size Bed chöne inusche. Läck mir hei gschlafe wi Örgeli...zzzzz...

so, parat für Big Apple unsicher ds mache. turnschue alege und ab geits!

bis speter, öie Smokey

 

  
Samstag, August 23, 2014 - 09:52

Mir mäude üs ab! Bye bye!

 
Samstag, August 23, 2014 - 06:19

Mit Hiuf vo Wii, (sehr viu Wii) heimer üs vor zwöi Wuche a di närveufribendi Ufgab gwagt ds ESTA-Formular uszfülle, oder o (ich bin kein Terrorist-Formular)!!!

Hänsu isch churzerhand uf John  umtouft worde u Roger het tatchräftigi Ungerstützig gleischtet bim usfülle vom Reise(s)pass.

 

Trotz Verluste (1xWeinglas, Dessertspure ufem Pass) heimer di Hürde erfougriich gmeisteret. Gli geits loooos!!!

Nachtrag: MÄ hets gschafft Evy's Name fausch ds schribe...Konsequenz: Einreiseverweigerung! MÄ het de nomau usgfüut u de haut zwöimau USD 14.-- zautt;-)

Bis zum nächschte Mau.

Euer Reiseblogger Smokey:-)

Seiten