Wow, Wower, am Woweschte!

Zersch mau äs grosses Merci a Abi's! Dank ihrem Tip hei mr hüt dr Bryce Canyon bsuecht u si absolut hin u wäg. Aber vo Afang a: ZGeschtrige zNacht im RockingV in Kanab, Utah isch z'bishär beschtä Ässe gsi. Mir wei itz hie nid irgendwie Wärbig mache, aber nach au däm Fast Food hets geschter wieder mau so richtig fein säuber kochets gä :-). Früsches Gmües, säuber gmachti Teigware u feine Härdöpfuschtock u natürlech ä richtig guete Bitz Fleisch. Yammm... 

Hüt Morge de, usgschlafe und rächt munter, hei mr üs de ufä Wäg gmacht richtig Bryce Canyon. Bi dä erschtä rote Felse hei mr ganz entusiastisch aghalte u gfötelet. När isch eigentläch nur Wald cho u mir hei üs scho gfragt, was äch de da so speziell söu si? Nach paar Meter zFuess het säch vor üs ä Landschaft us rote, dunkle u häue zerklüftete Felse uftah. Mir si mit offenem Mu blibe schtah u hei gar nüm gwüsst wo luege. Dr Fotoapparat hei mr gar nüm wäggleit. Au paar Schritt het säch Perspektive veränderet u mir si nid usem Schtune use cho. Hänsu hät so gärn Tierli gseh, aber ussert eim chline Chipmunk wo grad dervo ghüpft isch, het säch nüt zeigt. Au die Bäre, Bärglöie und Klapperschlange si äue das Blitzliechtgwitter vo dä Touris afe chli leid. 

Wieder mau dr Chopf vou mit Biuder, hei mr üs äs feins Subway-Sandwich gönnt u stüre dr nächscht Übernachtigspunkt a. Evi u Möni hei scho im Outo chli vor- oder nachegschlafe. Je nachdäm wie mäs aluegt ;-). 

Acho in St. George, heimr e Old Navy Lade gsichtet u si gad iche gstoche. Ds wibleche Shopping-Gen isch sehr schnäu aktiviert gsi
u d'Manne hei nach zwöi Minute ds Inventar vom Lade scho usswändig kennt, hei aber meh oder weniger geduldig gwartet. Ds Wohnviertel vo dere Stadt isch verglichbar mit dr Wisteria Lane vo Desperate Housewifes. Wunderschöni Hüser u der Rase gseht us aus würder täglech vomene persönleche Gärtner pflegt. So, mau ufd Suechi fürne Übernachtigsstell u öpis feins ds Habere.

Smokey, wo säch überleit dr Nachname Bryce aznäh 

Kommentare

Hei, ei, ei! Ungloublech, so wunderschöni und idrücklechi Biuder! I hät no lang chönne luege. Die Farbe und die verschiedene Geschteinsforme! Und ersch no die Texte. Schpannend und amüsant zum Läse. Danke tusigmau für de Iblick und das Miterläbe! Super, Evi, dass du dich ou hinder s Schtür gwagt hesch! Häits witerhi so wunderschön und guete Fahrt. Bi gschpannt uf morn. Liebi Grüessli - Mami / Trudy

Ob früh am Morge oder spät am Abe...öine Texte fiebereni zu jeder Tag- u Nachtzit entgäge. Mi chunnt usem Stuune, Mitfröie, Mitfühle, Mitguggle usw. gar nüme use! Trinket sones XXL-Cüpli o für mi u häbet Sorg!